ថៃ៖ បវរកញ្ញាតំណាងកម្ពុជា ឃឿន ប៉ូលីកា បានប្រកួតយកឈ្នះមកុដឯក ពីកម្មវិធីលំដាប់ថ្នាក់អន្តរជាតិ Miss Pre Teen International 2023 ដែលបានធ្វើឡើងនៅប្រទេសថៃ។

កម្មវិធីលំដាប់ថ្នាក់អន្តរជាតិ Miss Pre Teen International 2023 ប្រព្រឹត្តឡើងនៅថ្ងៃទី៨ ខែមករា ឆ្នាំ២០២៣ នៅប្រទេសថៃ ហើយអ្វីដែលពិសេសទៀតនោះគឺ តំណាងបវរកញ្ញាកម្ពុជា ឃឿន ប៉ូលីកា អាយុ ១៤ឆ្នាំ បានឈ្នះក្នុងការប្រកួត គ្រងមកុដ Miss Pre Teen International 2023។

ក្រោយទទួលបានមកុដឯកក្នុងកម្មវិធីលំដាប់អន្តរជាតិនេះហើយ បវរកញ្ញាវ័យក្មេងរូបនេះក៏បានអរគុណដល់អ្នកគាំទ្រ ដែលលើកទឹកចិត្ត និង ត្រៀមខ្លួនរួចជាស្រេចដើម្បីប្រលូកក្នុងវិស័យបវេកញ្ញានេះ។

ឃឿន ប៉ូលីកាថា៖ «នាងខ្ញុំអរគុណពុកម៉ែបងបងទាំងអស់គ្នាបានគាំទ្រនាងខ្ញុំ ហើយជំរុញទឹកចិត្តនាងខ្ញុំ។ នាងខ្ញុំត្រៀមខ្លួនធ្វើជា international queen ដែលល្អ ដែលជម្រុញទឹកចិត្តទាំងអស់គ្នាអោយមានភាពជឿជាក់ និងជឿជាក់លើខ្លួនឯង»។

គួរឱ្យដឹងដែលថា បវរកញ្ញា ឃឿន ប៉ូលីកា ជាបវរកញ្ញាវ័យក្មេងកម្ពុជាដំបូងគេបង្អស់ ដែលបានឈ្នះកមុដ «Miss Preteen International 2023»។

ជ័យលាភីនេះជាភាពជោគជ័យសម្រាប់វិស័យបវរកញ្ញាកម្ពុជា ខណៈក្នុងពេលតែមួយនេះ យុវតីកម្ពុជា មួយរូបទៀត ឌៀប សុហ្វៀរ៉ា អាយុ ១២ឆ្នាំ បានគ្រងដំណែងលំដាប់រងទី២ នៃកម្មវិធី Little Miss Junior Idol 2023 ដែលប្រកួតនៅឯប្រទេសថៃផងដែរ៕